40.000 ár

Ef ég hef skilið fréttina rétt þá dóu 101 maður og 40 ár fyrir hvert morð jafngilda þá 4.000 ára fangelsi en ekki 40 þúsund árum. Það er samt sem áður ansi langt og ef þeir fá lausn eftir helming tímans vegna góðrar hegðunar sem má alveg gera ráð fyrir a.m.k. koma þeir til með að hegða sér vel síðustu 90% refsingarinnar.  Þeir losna þá út rúmlega 2000 ára gamlir.  Gott á þá.

Hryðjuverkamenn í Madrid dæmdir í 40 þúsund ára fangelsi

Þrot

Hvenær er komið þrot og hvenær er ekki komið þrot... auðvitað er Eyjólfur þrotlaust að vinna að því að finna betra lið en því miður er hann alltaf með sama mannskapinn og reynir að koma leikmönnum í leikform með því að spila með landsliðinu... það er reyndar dálítið skrítið.  Ég held að við verðum að bíta í það súra að eiga ekki nógu góða leikmenn til að mynda gott landslið.  Skiptir engu máli hver þjálfarinn er. 

Eyjólfur: Ég er ekki kominn í þrot með þetta lið

Eyjólfi ekki um að kenna

Ég er ekki sammála því að Eyjólfur eigi að fara.  Við vorum að spila á útivelli við þjóð sem er betri en við í fótbolta og því fór sem fór.  Svo var náttúrulega vont veður, slæmar vallaraðstæður, ferðaþreyta í leikmönnum og þynnka.  Leikmenn skildu ekki útlenskuna sem dómarinn talaði en það var á sama máli og Villi skildi ekki nokkrum dögum fyrr og svo til að kóróna ferðina þá var ekki boðið upp á svið og harðfisk í útlandinu þannig að okkar mönnum er vorkunn að þurfa að ferðast yfir höf og lönd til að etja kappi við ofurefli.  Verum bara ánægðir að einhverjir nenna að standa í þessu.

Ljótur skellur Íslands í Liechtenstein

Landsambandið

Mér er spurn, hvað ætli það séu margar konur í þessu landsambandi.  Það eru örfáir sem kusu frjálslynda flokkinn, sem nota bene hafði ekkert út á Margréti að setja á meðan hún var í minnihluta en tækifærimennskan sem hún er sögð nýta sér virðist vera jafnt hinu megin borðsins því vantraustið kemur ekki fram fyrr en völdin koma allt í einu upp í hendurnar á henni.  En að fjöldanum... það eru örfáir (6500) sem kusu frjálslynda og segjum að  helmingur að þeim  eða 3250 sem eru konur.  Það er svo kannski 5% af þessum konum í mesta lagi sem er í landsambandi kvenna í frjálslynda flokknum sem gerir í mesta lagi 150 konur og er þá ansi langt seilst held ég.  Tækifærissinnunum fjölgar með hverjum deginum sem líður frá OR málinu og mér sýnist konurnar í þessum flokki vera hluti af þeim.

Vantrausti lýst á Margréti Sverrisdóttur

Landsleikur

Ísland lá fyrir Lettum í dag og var það e.t.v. fyrirsjáanlegt.  Það sem var ekki fyrirsjáanlegt var hversu værukærir Íslendingar voru í vörninni, þeir ætluðu að spila eins og Ítalía eða Spánn út úr vörninni en Lettar pressuðu stíft og hirtu boltann trekk í trekk rétt utan vítateigsins.  Steininn tók þó úr þegar Kári nokkur Árnason birtist, ég hélt að hann væri búinn með sinn kvóta sem farþegi í landsliðslestinni en svo er greinilega ekki. 

þegar kemur að öðrum leikmönnum er óhætt að segja að menn voru nokkuð frá sínu besta og voru alveg búnir þegar leið að lokum leiksins.  Menn sátu fastir á hælunum og komust ekki af stað á móti boltanum og hættu að hlaupa í eyður heldur biðu eftir að fá boltann í fæturna.  En svona er þetta.. við tökum vonandi næsta leik sem er á móti Lichtenstein.

Raunasaga úr sjávar"þorpi"

 

Brátt við Bingi skyldum funda

Í Breiðholtið hann mun skunda

En einhver töf er enn  á því

Annað hann fór víst í dömufrí.

 

Þar var kominn Glanni glæpur

Getulaus í höfði tæpur

Hann brosti hér en þar brast í grát

Bara sagðist vera mát.

 

Hann sér kuta  góðan keypti

Keyrði í bak mitt og af byssu hleypti

Skaut mig niður af stalli þeim

Skemmdi frægð mín´um allan heim

 

Það vita:..

Bingi Framsóknar og Dabbi læknisins

Guðni orðheppni og Marteinn mosdalinn

Geiri Sjálfstæði og Yoko Onoin

Hringur stjarnanna

Og einnig ég

 

Atkvæði vildi ég aðeins veiða

Vildi ekki Binga meiða

En hann sagði mér fara heim

Hann tók í höndina á ÞEIM

 

Hann ætlar víst öllu hér að ráða

Hans fortíð veldur mér þó kláða

Hann rembist einn sem rjúpa við staur

Reynir að sanka að sér aur..

 

Það vita:.

Dabbi læknisins og Svandís vinstri græn

Denni dæmalaus og tími minn kemur

Alfreð alvitur og Margrét Sverris Sverr

Dabbi í bankanum....

Og einnig ég

 

Reiður orðinn rölti til Geira

Reyndar sagðist hann ei vilja heyra

Sagði „Villi æi andskotans

Reynd´að komast brátt til manns“

 

Friðarsúlan friðsæl stendur

Fór ég þangað ekkert kenndur

Friður var þar fínn um allt

Nú friður er úti mér er kalt

 

Brátt maður verð ég  í minnihluta

Marteinn á reyndar góðan kuta

Stingur hann mig strax í bak

Sterkt hefur hann á mér tak

 

Ég kúri heima og klökkur vona

Kannski fer þetta ekki svona

Er þetta draumur sem deyr út senn

Dagur kemur ég ræð hér enn

 

Það vita...

Dabbi læknisins og Júlli Vífillinn

Hannes Hólmsteinninn og allir íslenskir

Yoko Onoin og gömlu bítlarnir

Restin af heiminum....

En ekki ég.

 

Borgarstjórn

Merkilegt hvað gerðist í vikunni.  Menn sem hafa stungið hvern annan í bakið eru orðnir samstarfsmenn í dag.  Hvað gera menn ekki fyrir smástund á stjórnarstólunum.  Eins og nokkrir þeirra hafa nefnt þá vilja þeir vera í meirihluta og er það þá til þess vinnandi að ganga á bak orða sinna, stefnu flokks síns ef að það dugar til að fá að "ráða".  En ráða þeir einhverju, hverjir ráða ef allir eru með mismunandi stefnu.   Verður þá ekki niðurstaðan sú að enginn flokkur fær sínu framgengt en allir eitthvað smá eða hvað..  Björn Ingi hefur nú sýnt það að ef hann vill eitthvað heitt þá verður það að ganga annars verður hann reiður - og fer að gráta.

Svandís ætlar að stjórna Orkuveitunni harðri hendi en Björn er þar áfram.  Flokkarnir hafa samþykkt að láta Orkuveituna ganga í gegnum mikið skoðunarferli en það væri nær að láta Björn Inga, Vilhjálm og Alfreð Þorsteins ganga í gegnum skoðunarferli, hafa þeir persónulega hagnast eitthvað á þessu endalausa brölti með Orkuveitu Reykjavíkur...

 Hvar endar þessi endaleysa... og hvernig.

Nú hlýtur allt að falla í ljúfa löð því að Dagur er með lausn á Sundabraut, Svandís er með lausn á Orkuveitumálum, Samfylking er með lausn á leikskólavandanum og eflaust kennaralaunavandanum líka, Frjálslyndir eru engin lausn og Björn Ingi er með lausn á heimilisútgjöldum sínum enda heldur hann öllum sínum bitlingum enda með eindæmum saklaus.

Skammtastærðir..!!

Nú er skammtafræði ekki eingöngu í náttúruvísindum heldur einnig og ekki síður í viðskiptafræði.  Það var áhugaverður þáttur í sjónvarpinu um mat og stærðir á skömmtum ásamt fleiru.  Ég fór að velta fyrir mér og rifja upp skammta og stærðir hér áður fyrr.  Þá keypti maður sér litla eða stóra (33cl) kók og kannski lítið eða stórt prins póló.  Nú er stórt prins póló orðið lítið prins pólo og til er XL prins póló og svo er stór kók orðin hálfur líter og maður sér krakka með tveggja lítra kókflösku á vörunum.  Það er miklu fleira, mars og XL mars, Kit Kat og 30% frí viðbót við eðlilega stærð.  Popp í bíó er bara grín, lítill popp er eins og stór var, kókglös í bíó eru stórt, mjög stórt eða risa stórt.  Pizzur eru allt of stórar, enginn kaupir þessar litlu.    Ef maður fer í ísbúð og kaupir barnaís þá er hann jafnstór ef ekki stærri en venjulegur ís var fyrir 3 - 4 árum.  Allt gos er drukkið úr hálfslítra brúsum og þykir það tíðindum sæta ef menn kaupa appelsín eða kók í gleri (litla) en ekki hálfan líter hið minnsta.

 

Fólk horfir á hreyfingarleysi og kennir því um hvernig næsta kynslóð er orðin.  Auðvitað er hreyfingarleysi hluti af vandamálinu en er ekki hin ellan magnið sem látið er ofan í sig.  Það er tilboð á kóki... þú kaupir sex 2ja lítra flöskur og færð 50 krónur í afslátt og hvað gerist, ansi margir skella kippunni í körfuna og þegar 12 lítrar af kóki eru til þá er enginn hægðarleikur að hafa hemil á drykkjunni meðal heimamanna.  Kexpakkar eru með 50%extra ókeypis. 

 

Við erum orðin svo blind á þetta að við tökum þetta sem sjálfsagðan hlut en það eina sem gerist er að neyslan á þessum vörum sem oftar en ekki eru "óhollar" eykst.   

F.H. bikarmeistari - Fylkir í Evrópukeppni

Það er ekki oft sem maður heldur með F.H. en í dag var ekki hjá því komist vegna eiginhagsmuna því að sigur hjá F.H. þýddi að Fylkir fékk evrópusæti í Toto-keppninni sem hefur braggast eilítið frá því að þetta var baggi á liðum. 

Stjórnmálaóreiða

Það er alveg með eindæmum hvað stjórnmálamenn eru sjálfhverfir.

Framsóknarflokkurinn rétt nær einum manni inn í borgarstjórn og sest hann í oddasæti og veður yfir borgarbúa á skítugum skónum og hirðir allar þær krónur sem koma inn á vegum veitufyrirtækja og skiptir upp á milli hirðmanna sinna. Hann hefur nákvæmlega ekkert fylgi á bak við sig og það er hreint með ólíkindum hvað hann er að gera miðað við fylgið.

Sjálfsstæðisflokkurinn er ekkert skárri að hafa ekki burði til þess að standa upp og slíta samstarfinu í kjölfar svona fáránlegra samninga. Það verður gaman að fá reikninga fyrir orku inn um lúguna eftir einhver ár þegar strákarnir í borginni hafa klúðrað einhverri yfirtökunni og verða að hækka verðið á rafmagni / heitu vatni til að klóra yfir klúðrið, en hættir einhver, nei... hér þarf ekki að bera ábyrgð á klúðrinu nema þá hjá þeim sem reka heimilin þeir þurfa að axla ábyrgð en þeir sem reka fyrirtæki/stofnanir þeir eru í peningaáskrift hjá fjármálaráðuneytinu.

 Merkilegt að forstjórar stofnana skuli ekki fjúka þegar ár eftir ár er farið heiftarlega fram úr fjárveitingum... ég veit að bankinn minn myndi ekki leyfa mér þetta..

Svo er annað líka en það er yfirtaka sveitarfélaga á verkefnum frá ríkinu.  Sveitarfélögum er afhent verkefni sem kosta gríðarlega mikið en fá lítið sem ekkert með þessum verkefnum frá ríkinu.  Sveitarfélögin eru eins og smákrakkar (án þess þó að ætla að gera lítið úr smákrökkum) sem fá nýtt dót, verða alsæl að fá fleiri leikföng en geta svo ekki gert neitt almennilegt úr því.  Hvernig væri að sveitarfélögin tækju yfir rekstur landsvirkjunar og annarra stofnana sem gefa eitthvað af sér frekar en taka að sér það dýrasta og standa eftir slipp og snauð.   Það er ekki furða að ríkiskassinn skili afgangi.